தவ சஜிதரன் (1983 - )

---

தவ சஜிதரன் -  மொழியக நிறுவுனர். மரபு மற்றும் நவீன கவிதை வடிவங்களை நுட்பத்துடன் கையாளக்கூடிய, தனித்திறன் கொண்ட தமிழ்ப்பாவலர். ஓசையின் உயிர்ப்பும் படிமச் செழுமையும் ஆழமான மெய்யியல் நோக்கும் இவரது கவிதையின் அடையாளங்கள். மகாகவி பாரதி இவரது ஆதர்சம். எட்டாவது வயதில் சந்தக் கவிதை எழுத ஆரம்பித்தவர். 

கடந்த 2010ம் ஆண்டிலிருந்து இங்கிலாந்தில் வசித்து வருகிறார். இலங்கை, மத்திய மலை நாட்டின் மாத்தளை நகரை முதன்மை வாழிடமாகக் கொண்டவர். யாழ்ப்பாணத்தில் பிறந்தவர். தாய்த்தமிழகத்தின் பல்வேறு ஊர்களுக்கும் ஐரோப்பிய நாடுகளுக்கும் பயணம் செய்திருப்பவர். 

யாதும் ஊரே யாவரும் கேளிர் என்ற உலக நோக்குடையவர். காருண்யத்தின் வழி மானுட விடுதலைக்கு வழி காட்டும் புத்த பகவனின் தம்மத்தைப் பயின்று ஒழுகும் நாட்டம் கொண்டவர். 2013ம் ஆண்டு தொடக்கம் ஆனபான ஸதி, விபஸ்ஸன தியானங்கள் பயின்று வருகிறார்.

தந்தையார் தவயோகநாதன். தாயார் இந்திராணி. யாழ்ப்பாணம், மாதகலில் மொழிப்புலமையையும் மரபுவழித் தமிழ் மருத்துவத்தையும் தலைமுறை தலைமுறையாகப் போற்றிப் பேணிவந்தவர்கள் சஜிதரனின் தந்தைவழி மூதாதையர். தமிழகத்தின் வேதாரண்யத்துடன் (திருமறைக்காடு) குருவழித் தொடர்புடையவர்கள். யமக அணியில் புலியூரந்தாதி பாடிச் சிதம்பரத்து நடராஜரைப் புலியூரானாகத் துதித்த - யாழ்ப்பாண வைபவமாலை பாடிய - மாதகல் மயில்வாகனப்புலவர் தவ சஜிதரனின் முன்னோர்களில் ஒருவர்.